Вышов другый том книжкы Чехословацькый світ в Карпатах

Чехословацькый світ в Карпатах – то назва книжкы, котру кінцьом 2018-го року выдало Здружіня інтеліґенції Русинів Словеньска в авторстві Владиміра Куштєка. Публікація, котра має тексты в чеськім, словацькім і русиньскім языку, была вкладом той орґанізації ку святкованю сторічніці републікы.

Теперь здружіня выдало другый том публікації, котрый є присвяченый історії штоденного жывота на Підкарпатьскій Руси в періоді, коли Підкарпатя было частьов Чехословацькой републікы.

Як інформує выдаватель в анотації книжкы, в першій части публікація приближує жывотны судьбы у своїм часі знамых русиньскых і словацькых особностей, котры на тій теріторії діяли. Єднов з тых особностей є і Кіріл Прокоп, русиньскый політік меджівойнового періоду, котрый быв у своїм жывоті веце раз перзеквованый.

Далшы капітолы пописують традічне жыдівске весіля і освітні актінвости ужгородьского маґістрату в односинах ку ромскій меншыні. Книжка далше припоминать, же чехословацькый період приніс нелем модернізацію і звекшіня выробы підгоряньского пивовару і мукачівской фабрикы на доган, але і не малый розвиток пошты і телеґрафу, обоходной сіті фірмы Батя і Леґіодружства. Тот період так само приніс вызначный вклад ку розвитку соколского руху, шпорту а турістікы в країні, але і ку укріпліню чехословацько-румуньской взаємности і співпраці.

Остатня часть публікації приносить спомины автора на вандровку по Підкарпатьскій Руси у 1977-ім році. В книжці найдете богату збірку фотоґрафій, на котрых суть і писомны документы ці добовы артефакты. Автор Чехословацького світу в Карпатах ся довгодобо занимать модернов історійов Підкарпатьской Руси. Перед тым робив у загранічній службі Словацькой републікы.