Свідник здобыв грошы на проєкт біціґльовой стежкы

Три новы біціґльовы трасы і біціґльовый міст через ріку Ондава планує выбудовати місто Свідник. На проєктову документацію здобыло 28 800 евр з Міністерства транспорту і будованя Словацькой републікы.

Цілковый розрахунок є 30 400 евр, пятьома процентами співфінанцує документацію місто. Аґентуру TASR о тім інформовала говоркыня Свідника Крістіна Тхірова.

Еколоґія і турістічный рух

Ціла біціґльова стежка має мати два і пів кілометра. Перепоїть север, юг і запад міста і уможнить еколоґічный транспорт в рамках міста і до околіці.

„Выбудованя біціґльовой стежкы буде хосенне про розвиток внутрішнього містьского біціґльового транспорту, замістьску рекреацію і турістічный рух. Маєме в місті освітлены дві домінанты, што реалізовала безпрофітова орґанізація, і залучіли сьме ся до проєкту з польскыма партнерами, жебы вытворити пропаґачны матеріалы і промофілм,“ повіла про аґентуру пріматорка Свідника Марцела Іванчова.

За їй словами вшыткы тоты аспекты вєдно з будованьом рекреачных трас помагають розвивати турізм в у свідницькім реґіоні. „Тішыть ня, же їднаня зо Словацькым водогосподарьскым подником в Кошыцях принесли інтерес робити і на выбудованю біціґльовой стежкы коло рікы Ладомирка, котра вже теперь є облюбленов рекреачнов зонов,“ додала пріматорка.

Перепоять вольночасовый ареал з далшыма частями міста

Планована біціґльова стежка в трьох трасах має споїти вольночасовый ареал міста на Фестіваловій уліці, в котрім находить фотбалове гріско, амфітеатер, сканзен і лісопарк, з існуючов і планованов забудованов частьов на правім березі Ондавы, але і з далшыма ареалами на Бардейовскій уліці.

Проєкт біціґльовой стежкы рахує і з мостом, котрый буде пятьдесять метрів довгый і піде через ріку Ондава. Новов біціґльовов стежков за словами пріматоркы Свідник дасть вклад до охороны жывотного оточіня і підпорить ся еколоґічный способ жывота.

Як додала Тхірова, о фінанчны средства на реалізацію того проєкту буде місто жадати з екстерных жрідел в далшых ґрантовых вызвах.

Жрідло фотоґрафії: Pixabay.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА