Сумар дня на 28. січня/януара 2020 р.

Приносиме вам сумар медияльной ґрупы ЛЕМ.фм+ на ден 28. січня/януара 2020 р.

Новый віцеведучый Соймовой Комісиі

Представник німецкой меншыны Ришард Ґалля остал віцеведучым Соймовой Комісиі Нацийональных і Етнічных Меншын. Його кандидатуру зголосил посол Евґеніюш Чыквін. В часі голосуваня його номінацию підтримало осмеро членів комісиі, проти был лем єден голос а шестеро ся стримало. Як скоментувал сам Ришард Ґалля, выбраня го на становиско віцеведучого єст свого рода актом переданя пошаны вшыткым меншынам, котры находят ся в Польщы. Зазначыл тіж, же в меншыновым середовиску єст іщы барз вельо до зробліня. Предовшыткым треба більшой підпоры для підтриманя культуровой і языковой достоменности меншын. Посол підкрислил і, же в 2020 році минят 15 років од схваліня уставы о нацийональных і етнічных меншынах і о реґіональным языку. Устава тота мала мати новелізацию в 2015 році, але не была она підписана президентом Польской Республикы Анджейом Дудом.

Дальшый успіх Дариі Шкурат

Дальшый успіх Дариі Шкурат з Войскового Спортового Клюбу Закопане. Дария, родом з Бортного, зас осягнула барз добры результаты. З дводньовых змагань ІІ едициі Нацийонального Проґраму Розвитку Лыжных Спортів привезла золотый і срібный медаль. Орґанізатором змагань был Польскій Лыжный Звязок, котрый заохочує молодіж до спортовой ривалізациі і підтримує розвиток лыжных спортів. Шкурат вказала спрінтерску клясу, без ниякого проблему, а і зо значном перевагом над конкуренцийом выграла спрінтову кваліфікацию, за што отримала золотый медаль. Срібный медаль признали Дариі за другє місце на 3-кілометровій трасі. В змаганях участ брала і сестра Дариі, Орина Шкурат, тіж з клюбу ВСК Закопане, котра на трасі 7,2 кілометрів в ґрупі юньорок заняла 9 місце. Окрем сестер Шкуратовых на змаганях вказали ся тіж члены Школярского Спортового Клюбу Ганчова з місцями 19-ым в юньорках і 25-ым в юньорах. Сут то другы того рода змаганя в тым сезоні, першы проходили в Мучным. Дальшы будут уж 1. лютого/фебруара в Закопаным. Треба зазначыти, же буде о што ривалізувати, найліпшы отримают фінансовы нагороды, аж і пропозицию покликаня до Нацийональной Кадры Польщы. Як повіл тренер обох сестер, Едвард Будный, Дария має барз добру кондицию, єст добрі зрыхтувана до змагань, а найважнійше, має потенциял, што вказала на початку того сезону в Італиі.

Выстава Ярослава Єнджейовского в Ґорлицях

Іщы лем до 5. лютого/фебруара в Ґалериі Штукы Двір Карвациянів в Ґорлицях можна обзерати роботы Ярослава Єнджейовского. То абсольвент ґрафікы Академіі Красных Штук во Вроцлаві, вызнаный і вельо разів нагородженый артиста. Його выставы мож было видіти і заграницьом, м.ін. в ґалериях в Сієтль і Сан Франціско, а тіж і в Японіі і Кытаю. В Ґорлицях працы Ярослава Єнджейовского вказали ся уж в 2016 році. Його актуальна выстава має наголовок «Архітектура Нижнього Шлеска і Полудньовой Малопольщы в мецо-тінто». Творы артисты представляют медже інчыма костел в Санковій, каштель в Шымбарку ци панораму Біча, а з дакус дальшых стран Ратуш з Тарнова і Острув Тумскій з Вроцлавя. Інтересуючый єст тіж спосіб, в якій рыхтуваны сут працы. Мецо-тінто то техніка глубокого друку на мідяных плытках. Єст то єдна з найтруднійшых ґрафічных технік, але і найбарже чудова.

Памятковый значок з Міста Світла

Для вшыткых збераючых памятковы значкы маме добру відоміст. Звязок Туристичны Значкы Польща, котрый дає выріжніня містам і забыткам в цілій Польщы, признал Ґорлицям власный туристичный значок. Кружок з Міста Світла єст в 100% еколоґічный, выконаный з дерева і выпалена єст на ним панорама Ґорлиц та чысло 305. На тоту хвилю выріжненых своім значком єст більше як 6000 місц в 20 державах світа. Ґорлицкій значок можна купити в Павілоні Істориі Міста.

Фот. Gorlice24