Рекомендациі Рады Европы для Польщы

Рада Европы в рапорті о охороні нацийональных меншын в Польщы вказала на утримуючу ся в державі атмосферу нетолеранциі, расизму і ксенофобіі.

В опубликуваным перед тыжньом, 23. січня/януара 2020 рока, рапорті видно проґрес в квестиі зінтеґруваня меншын, головні Ромів, особливо в сфері едукациі. Видно, што власти підперают шор інституций і проєктів, особливо такы, котры підтримуют захованя жыдівской спадковины в Польщы. Выказано єднак вельо браків.

Дале брак едукацийных материялів і інституциі культуры

В пресовым комунікаті Рады Европы тыкаючым рапорту бесіда є о фурт утримуючій ся атмосфері нетолеранциі, расизмі і ксенофобіі в Польщы. Порадный Комітет дс. Рамовой Конвенциі о Охороні Нацийональных Меншын вказал на тото, што «правны рамы, якы хоронят права нацийональных меншын, значучо ся не змінили в періоді моніторуваня». Звернули тіж увагу, што «на жаль не зроблено в Польщы проґресу в обшыри повторюючых ся прошынь о вызнаня Шлезаків етнічном меншыном або шлезского языка реґіональным языком».

В рапорті поміщено заувагы, же не опрацувано ниякых підручників для лемківской і украіньской меншын, хоц были такы рекомендациі скорше. Написано о постійным браку дидактичных материялів до вчыня. Вымінят ся тіж, што дальше не повело ся ниякій з менше чысленных меншын (лемківска, караімска, ормяньска і татарска) забезпечыти постійного фінансуваня для основаня інституциі, котрой цілю буде підпераня захованя і розвиток культуры і языка.

Атмосфера ненависти і брак довіря, што мож доходити своіх прав

Дальше в рапорті пишут, што «мимо значучого занижыня даных» статистикы вказуют видиму тенденцию до насиляня ся примірів провокуваня до ненависти і інцидентів на фоні ненависти, особливо взглядом мусульманьской спільноты, а тіж жыдівской меншыны, Ромів, а і штораз частійше Украінців. Комітет думат, што «конечне єст скоре выелімінуваня браку довіря до власти, а тіж выелімінуваня браку ефективного досліджаня і доходжыня своіх прав на судовій дорозі, кєд іде о злочын на фоні ненависти».

Рада Европы рекомендує польскым властям промувати взаімне зрозумліня медже векшыном а ріжныма меншыновыма ґрупами на основі узнаня зложености істориі Польщы. «Буд-якы проявы нетолеранциі і ворогости на етнічным фоні повинны быти туплены на найвысшым політичным рівни, ефективні троплены і караны» – підкрислено.