Лемківскє Колядуваня в Ґорлицкым Центрі Культуры

Понад сотка діти з основных шкіл, находячых ся в ґорлицкым повіті, запрезентувала ся на сцені Ґорлицкого Центра Культуры. Стріча, яка орґанізувана єст каджый рік Стоваришыньом Руска Бурса, то уж постійный елемент ґрафіку різдвяных подій на Лемковині.

Школярі запрезентували ся зо своіма різдвяныма репертуарами і колядами. Аж і конферансиєрком заняли ся ученикы – стрічу вели осмоклясисты з Основной Школы з Ґладышова. О 14.00 год. в середу, 22. січня/януара 2020 р., зачало ся спільне колядуваня, до которго ученикы рыхтували ся уж долшый час.

Наймолодшы колядникы пришли з Бодаків

Крас облечены і з усміхами на ґамбі стрічу зачали школярі з Ганчовой, зрыхтуваны Анном Рыдзанич. Пак на сцену вошла наймолодша з выступуючых ґруп – зо школы в Бодаках. Разом з учениками на сцені вказали ся тіж іх учытелькы, імост Мария Цідило з Бортного і Орина Гутиряк. Діточкы заспівали коляды і желали публиці доброго рока. Наступном колядничом ґрупом были школярі з Брунари (тіж рыхтуваны Анном Рыдзанич). Хоц ґрупа не была велика, не мож было того одчути в іх выступі – іх спів захопил цілу публику. Зо Снітниці, сусіднього до Брунари села, на сцену вошло понад 15 школярів, была то єдна з найбільшых ґруп, яка выступила в тот ден на сцені Ґорлицкого Центра Культуры.

Бракло Жыда, але дали раду…

Зрыхтуваны Варваром Дуць, вказали ся з богатым репертуаром коляд, а і з вертепом – дакус на забавні. Школу з Криґу репрезентувала штыріособова ґрупа колядників. Окрем заспіваня коляд, ученикы заграли нa своіх музичных інструментах: ґітарі, гушлях і клярнеті. Была то єдина ґрупа з того рода репертуаром. Пак на сцені выступила ґрупа школярів з Высовой зрыхтувана А. Рыдзанич. Діточкы і молодіж вказали ся в вертепі і різдвяных желанях. Найбільша коляднича ґрупа приіхала з Ґладышова. Ученикы зрыхтуваны В. Дуць вказали ся з найдолшым вертепом. Молоды акторы мусіли вказати тіж своі здібности в обшыри імпровізуваня, бо розхворіл ся ім Жыд. На конец презентациі колядників вказала ся ґрупа з Баниці. Діточкы представили свій різдвяный вертеп, а на конец желаня.

«Тиха ніч» – заспівана по лемківскы

Коротком перервом од вертепів была коляда «Тиха ніч» заспівана через Наталию Пелехач і Михала Ротко при звуках ґітары, на котрій грали Магдалина Болех і Ніколя Гойсак. На закінчыня стрічы выступила молодша ґрупа ансамблю Терочка. Вшыткы ґрупы были нагороджены заслуженыма оплесками.