Радийова реляция зо святочной академіі присвяченій ХІІІ Нацийональному Святу Русинів Сербіі – четвер, 20.00 год.

ХІІІ Нацийональне Свято Русинів в Сербіі проходило 17. січня/януара 2020 р. В поєдных русиньскых селах і тых містах, де Руснакы пішли жыти за роботом, проходили торжества присвячены 269 річници переселіня ся першых русиньскых родин з Гір на полудне, на уроджайну землю, Паноньску Рівнину. Доднес Руснакы в Сербіі всокотили свій язык, віру, звыкы і обычаі. Плекают і проявляют, особливо товды, коли єст свято в громаді, свою достоменніст.

Кульмінацийным моментом прославляня ХІІІ Дня Русинів з Сербіі были архієрейска благодарна Служба Божа, справувана в церкви Преображыня Господнього в Шыді. А пак, в культурным центрі зачала ся святочна академія присвячена 100. річници од зорґанізуваня освітнього жытя Руснаків в Шыді.

Присутны на академіі были знамениты гості, в тым чыслі владыка Ґеорґій Джуджар, власти Войводины, посол до сербского парламенту Олена Папуґа і інчы. Привитаны были делеґациі Русинів зо Словациі, Польщы і Украіны. Проґрам зачал ся од одспіваня сербского гымну і гымнічной пісні Руснаків Войводины: «На Бачваньской Ровні». По перемовлінях владыкы і орґанізаторів прошол артистичный проґрам, в котрым выступили домашні выконавці, хоры, співакы, декляматоры і Нацийональна Оркєстра Руснаків.