Потяг «Вояк Швейк» того літа тіж в пятниці

Медженародный потяг «Вояк Швейк», якій ходит на пути з Ряшова до Меджелабірців, буде того літа курсувал тіж в кажду пятницю, інформує о тым словацкій денник Korzár.

Рішыня о пущыню літом получынь тіж в пятниці было схвалене польскыма і словацкыма урядниками на спільній стрічы в Гуменным.

Розшыреный плян

Того рока, згідно з принятым договором, потяг «Вояк Швейк» буде ходил о єден ден більше нич влони.

В порівнаню до влонишнього сезону, коли потяг ходил в липци/юлию і серпни/авґусті лем в суботы і неділі, тепер словацка і польска желізниці пустят получыня тіж в пятниці. В минулым сезоні, котрый тырвал лем два місяці (вакацийный період), потяг перевюз в обі страны бл. 3000 осіб, ходили товды штырі потягы в суботу і по два в неділю. Обі желізниці видят в тым успіх, тіж про рішыня о выдолжыню получынь о єден ден.

Як повіл про денник представник польской желізниці, Полякы сут задоволены з веденой спілпрацы. Додал, што польска страна єст заінтересувана пущыньом в будучым році потягів, якы дадут можніст подорожы до Кошыц ци Гуменного. Польска желізниця робит тіж над ріжныма бенефітами про подорожуючых, котры уж по части ся провірили. Сут то м.ін. знижкы при вході до музею в Саноку.

Початок од кінця червця/юнія

Тогорічный «Вояк Швейк» зачне ходити в остатнім тыжни червця/юнія. Дата не припадкова, бо товды буде проходил шторічный Фестіваль Культуры і Спорту в Меджелабірцях (29.–30. червця/юнія).

Про фестіваль тіж будут зорґанізуваны додатковы получыня. І так потяг одыйте з Меджелабірців до Санока о 21.00 год. Годину пізнійше одыйде до Ряшова. Пізна година єст так заплянувана, жебы участникы фестівалю могли видіти як найвеце з його богатого проґраму.

Пут, котром іде потяг з Польщы на Словацию, веде через лупківскій тунель, а тым самым через русиньскы села на Лемковині і Пряшівскій Руси. Через тото заінтересуваня туристичным рухом росне не лем в околицях Ряшова, Санока і Меджелабірців, але тіж на меньшых русиньскых селах.

Потяг буде ходил до першого вікенду вересня/септембра.