Контроля ліків інформує, же меншыновый язык бы мав быти і в апатыках

Словацькый Державный уряд про контролю ліків (Štátny úrad pre kontrolu liečiv), на своїй вебовій сторінці інформує, же меншыновы языкы бы мали быти хоснованы і в апатыках. Недотримованя закона треба голосити.

Уряд про контролю ліків быв як орґан державной справы ословленый Урядом уповномоченого влады Словацькой републікы про народностны меншыны зо жадостьов о співпрацу при пошырьованю свідомости о тім, же ся в апатыках мають давати інформації і в языках народностных меншын.

Уряд ся при тім одкликує на конкретный текст закона, котрый рішыть поволіня про додавателів апатыкарьской старостливости.

Основны інформації і в меншыновім языку

В селах і містах, як пише ся і на сайті Державного уряду про контролю ліків, в котрых гражданы Словацькой републікы, котры належать ку народностній меншыні творять найменше 20 процент населіня, інформації, котры дотуляють ся огрожіня жывота, здоровя, безпечности або маєтку гражданів Словацькой републікы уваджають на місцях приступных людям коло державного языка і в языку меншыны.

Уряд на сайті повідомлює, же то платить і про апатыкы. В припаді апатык і їх філій бы мали быти в языку меншыны головно інформації о тім, хто має ліценцію на апатыку, мено і призвіско ведучого, назва і адреса апатыкы, робочій час, але і інформація о тім, хто має поготовостну службу, кедь є апатыка заперта.

Меджі далшы інформації, котры бы мали быти і в языку меншыны, належать наприклад порядок рекламацій, высше спомянуты інформації, котры дотуляють ся огрожіня жывота, здоровя, безпечности і маєтку, але познакомліня паціентів о тім, што робити з небезпечным одпадом.

Недостаткы мож голосити

Уряд інформує, же він сам не выконує контролю дотримованя тых обовязків, котры суть записаны в законі о хоснованю языків меншын. Покля такы інформації має, подавать їх Уряду влады Словацькой републікы, котры має в тых припадах право рішыти.

Но єдночасно контрольный уряд додавать, же покля хтось має інформації о недостатках в апатыках што до хоснованя языків народностных меншын, чім ся порушує закон, може тоты інформації заганяти прямо на Уряд влады СР – Уряд уповномоченого влады СР про народностны меншыны.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА