Сумар дня на 9. січня/януара 2020 р.

Приносиме вам сумар медияльной ґрупы ЛЕМ.фм+ на ден 9. січня/януара 2020 р.

Конец свят, початок маланковых забав

Помалы миняют різдвяны свята за юлияньскым календарьом. Днес іх третій ден, в котрым споминаме святого Штефана. Через вшыткы святочны дни в нашым радию чути мож было окрем коляд і вельо проґрамів, котры рыхтували сме специяльно про нашых слухачів. Редакторы радия ЛЕМ.фм передали і вінчуваня з нагоды свят і Нового 2020 Рока. Тепер помалы час на витаня як раз Нового Рока за старым стильом. З той причыны традицийно в реґіонах, де жыют Лемкы в Польщы, проходити будут Маланкы, а радше маланковы забавы. Найвеце з них одбуде ся в найблизшу суботу, 11. січня/януара. Докладно Новый Рік приде нам витати з 13./14. січня/януара і зато лем єдна Маланка буде орґанізувана точно в тот ден. Обуде ся она в Мохначці Нижній при Креници. Заграт гын русиньска капеля зо Свидника Аллеґро. Про веце маланковых забав чытайте в части «Будучы подіі» на нашым інформацийным портали.

Днес споминают на Василя Турока-Гетеша

Днес в Музею Русиньской Культуры в Пряшові подія, про котру сме уж шырше інформували. О 17.00 год. зачне ся споминова стріча на Василя Турока-Гетеша, в звязку з 80. річницьом народин той єдной з найвыдатнійшых персон русиньского руху на Словациі по 1989 р. Споминати особу Турока-Гетеша будут і другы громадскы діячы, акторы, журналисты і люде культуры. В січни/януарі oдбудут ся і дальшы акциі. 16-ого о 17.00 год. одбуде ся подія під назвом «Серна в нераю». Стріча буде присвячена темі крегкости і силы в слові і образі Данєлі Капральовой. Музичным гостьом подіі буде Михал Быцко. А 30. січня/януара так само о 17.00 год. буде авторскій вечер клявіриста і композитора Павла Мороховича. Подія має наголовок «Джаз в музею». На ню вступне то 5 евро.

Меджелабірці плянуют інвестициі

Місто Меджeлабірці буде протягом 2020 рока ґаздувало з історично найвешкым розрахунком. Сума грошы то 10,6 млн евро. Част проєктів, котры реалізувала буде містецка самосправа, то такы, котры не были завершены в минулым році і зато тепер сут они перенесены на 2020 рік. Того рока фінансово найбільшом інвестицийом має быти выбудуваня центра інтеґральной здравотной старости, на котрый выділено 820 тис. евро. Пріматор міста як раз тот проєкт має за єден з найважнійшых. Туристичну атракцийніст Меджeлабірців самосправа хоче звекшыти тым, же купит туристичный потяг і зреконструує автобусову і желізницьову стацию. Пріматор місцевости є спокійный про фінансы. Місто має задолжыня лем коло 2%, а в минулым році было успішне в здобываню грошы од влады ци Пряшівского Самосправного Краю.

«Окдрый Сандецкій Бескід» до купліня в скпелах сіти Емпік

Як поінформувал наше радийо ведучый редакциі маґазину «Одкрый Сандецкій Бескід», Конрад Роґозіньскій, зимовый номер часопису є уж в продажы м.ін. в 252 склепах сіти Емпік. Пропомнийме, што часопис «Одкрый Сандецкій Бескід» то модерный подорожничый маґазин, присвяченый вынятковому місцю на мапі Польщы, значыт Сандецкому Бескідови (як і Західній Лемковині). Одкрыват він перед чытачами таємниці і красу Бескіду в вельох аспектах. Внутрі найдеме інформациі придатны туристам та жытелям того реґіону, як тіж для професийоналистів туристичной бранжы. Не бракне в маґазині статий на тему звязану зо стильом жытя, спортом і бізнесом. Зимовый номер мож придбати в склепах сіти Eмпік, як і через Інтернет. Окрем того, од віторка, 7. січня/януара, діє специяльна електорнічна плятформа, одкале мож купити маґазин. Більше інформаций на сайті часопису. О самым маґазині бесідувал в нашым радию Якуб Зиґмунт в рамках циклю інтервю «Лемківскій Ґанок» з ведучым редакциі, Конрадом Роґозіньскым.