Вроцлавска кафедра має новый іконостас. Іконы Новосільского поміщены на стінах храму

В послідню неділю, 22. грудня/децембра, в православній кафедрі Рождества Пресвятой Богородиці во Вроцлаві освячено новый іконостас. Старый, котрый складал ся з ікон авторства м.ін. Юрия Новосільского, был здемонтуваный, а поєдны іконы розміщено на стінах храму.

Як інформує сайт вроцлавско-щеціньской єпархіі Польской Автокефальной Православной Церкви, освячыня нового іконостасу было завершыньом близко пілрічного стараня і рыхтуваня до його поставліня.

Полна адаптация святыні

Выміна іконостасу єст такой завершыньом полной адаптациі вроцлавского храму на потребы православных богослужынь. Роботы з тым звязаны зачал покійный владыка Єремія (1943-2017), а продолжат іх теперішній предстоятель архієпископ Юрий. Першы адаптацийны працы были ведены такой одраз по переданю евангелицкого костела св. Варвары для православной спільноты в червци/юнію 1963 р.

Теперішній адаптацийный процес складал ся з трьох етапів. Першым было выконаня розпису стін, дальше поставліня шестираменного креста на церковній вежы, а тепер як раз выміна попереднього іконостасу на такій, котрый дотримує вшыткы нормы літургічной традициі православной церкви.

Іконостас з Грециі

Новый іконостас походит з Грециі. Єст зробленый вполни з дерева. Был специяльно запроєктуваный і вырізбленый на потребы вроцлавской кафедры.

Попередній іконостас, котрый містил в собі іконы Юрия Новосільского і Сотіріса Пантопулоса, як інформувало кафедральне духовенство – не был полный і не сполнил свойой ролі – не одділял олтарной части і храму вірных. Іконы з попереднього іконостасу, по його здемонтуваню, были перенесены в інче місце. Головны іконы Ісуса Христа і Богородиці были поміщены в ківотах на столпах церкви. 12 праздничых ікон та крест поміщено на східніх стінах головной нефы.

Початковы пляны здемонтуваня іконостасу авторства м.ін. Юрия Новосільского выкликали вельо порушыня головно серед специялистів і любителів церковного кумшту. «Явило ся вельо фальшывых, безосновных і кривдячых скражынь під моім адресом, як і духовенства, але тепер, смотрячы на іконостас, думам, што боронит ся він сам», повіл по освячыню архієпископ Юрий. Владыка подякувал вшыткым жертводавцям, в тым і прибылым з Грециі авторам нового іконостасу. Поміщено в ним тымчасовы іконы зроблены при помочы цифровой технікы, котры в будучности будут заступлены писаныма іконами.

Вроцлавскы памяткы Новосільского

Новосільскій ідентифікувал ся з православійом, але творил і для католиків, і грекокатоликів. З вроцлавскых ікон артисты до державного реґістру не так давно вписаны были м.ін. вітражы в костелі покорвы св. Варфоломія, іконостас, хоругвы і іконы з грекокатолицкой кафедры, яка ся находит при плаци єпископа Нанкєра.

В православній кафедрі окрем бывшого іконостасу авторства Новосільского сут іщы фрескы на склепліню олтаря і в каплици Воздвижыня Господнього Креста. Реченый іконостас уж раз прібувано здемонтувати, было то в 70. роках минулого столітя. Товды демонтаж затримал православный митрополита Василий.

фот. www.diecezjawroclawsko-szczecinska.pl