Зимовый маґазин «Одкрый Сандецкій Бескід» од січня/януара 2020 доступный тіж в сіти Емпік!

Як нас поінформувала редакция маґазину «Одкрый Сандецкій Бескід», найпізнійше початком січня/януара буде выданый зимовый номер маґазину, котрый буде продаваный тіж в 250 книгарнях сіти Емпік в цілій Польщы.

Припомнийме лем, же «Одкрый Сандецкій Бескід» то новіст на выдавничым рынку. Твореный ґрупом люди з околиц Мушыны, Крениці-Здрою та окремых сел і міст Сандеччыны, додає нову якіст в промуваня реґіону Сандецкого Бескіду, як і центральной і східньой Лемковины. Редакция порталю ЛЕМ.фм недавно бесідувала з шефредактором маґазину, Конрадом Роґозіньскым, котрый заповіл, же в найновшым номері не бракне місця о Лемках і Лемковині та же в будучым буде постійна рубрика специяльні посвячена тій тематиці. Більше мож прочытати в інтервю з Конрадом під мотузком гев: Лемківскій Ґанок #12 – бесіда з Конрадом Роґозіньскым

Што іщы выявлят нам шефредактор перед премєром?

Як ся дознаєме, зимовый маґазин буде іщы грубшый од попереднього, бо буде мал аж 140 сторін з вартістным, мериторичным змістом, красныма знимками вельох авторів з Сандеччыны та вельо, вельо більше. «Одкрый Сандецкій Бескід» буде тіж мож купити не лем в Емпіках, але през Інтернет в електронічній версиі. Маґазин буде тіж продаваный стацийонарні в реґіоні і на специяльне желаня высылком. Очывидно, жебы промувати з іщы більшым розмахом, маґазин буде в двох языковых версиях – по польскы і анґлицкы. Дале же не знаме конкретнійшой тематикы зимового номера, але сме певны, же не бракне текстів о подорожах, туристикці, ляйф-стайли, бізнесі ци фотоґрафіі.

Будеме фурт інформувати о премєрі. Тішыме ся, же і в Сандецкым Бескіді сут місцевы ґрупы діячів, котры хотят діліти ся свойом пасийом і любовю до рідной землі і тым самым промувати реґіон!

Більше о маґазині «Одкрый Сандецкій Бескід» найдете на іх Фейсбуку (по польскы): www.facebook.com/odkryjbeskid/