На словацько-україньскій граніці обновлять драгы і мосты

Справа і утримованя драг Пряшівского самосправного краю зреконштруує вісем кілометрів драгы меджі селами Стащін і Уліч Сниньского окресу, коло граніць з Українов. Реконштруовати ся буде і на україньскім боці.

На модернізацію ся схоснують еврофонды в рамках черезгранічного проєкту. Іде о часть довгоочекованой модернізації комунікацій меджі Пряшівскым самосправным крайом і Закарпатьсков областьов Україны. Інформовала о тім аґентура TASR.

На словацькім боці зреконштруує ся драга довга майже 8,4 кілометра, котра веде ку гранічному переходу Убля – Малый Березный. В рамках той трасы оправлять ся і два мосты. На україньскім боці ся зреконштруує драга од державной граніці по припоїня на драгу H13 в части Малый Березный – Дубриничі. Іде о 11,5 кілометра драгы і єден міст.

Цілковый розрахункок схваленого проєкту представлює 4,38 міліона евр, з того дотація з проґраму черезгранічной співпраці ENI є в сумі 3,7 міліона, інформовав Пряшівскый самосправный край.

„Тым проєктом зліпшыть ся доступность словацькых і україньскых пригранічных реґіонів, жебы люди годны были скоріше і комфортніше дістати ся до роботы. Я пересвідченый, же сполочнов реалізаційов того проєкту укріпить ся партнерство на обидвох боках граніці, што є добрым сіґналом про далшу можливу співпрацу,“ повів пряшівскый жупан Мілан Маєрьскый.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА