Сумар дня на 10. грудня/децембра 2019 р.

Приносиме вам сумар медияльной ґрупы ЛЕМ.фм+ на ден 9. грудня/децембра 2019 р.

Новы порядкы на Маґурі

Новый сезон ізды на нартах уж ся зачал. Од кінця жолтня/октобра выстартували рыхтуваня до справного зачатку нового сезону, а од половины листопада/новембра помалы рушыли і вытягы на схылах гір. Так і свою інавґурацию заповіл тіж комплекс Ski Park Magura, находячый ся в Маластові, а в рамах заохочыня любителів нарт одвидіти іх трасы, представил нове лоґо. То не єдины зміны, бо змінил ся тіж арендатор. Од недавна підприємство Ski Park Magura, котрє являт ся правным властительом, рішыло выповісти дотеперішні умовы і самому заняти ся ведіньом того обєкту. Головныма цілями такого рішыня сут великы зміны іміджу та міцне дофінансуваня в обєкт. Куплены уж сут новы ратракы і арматкы. Треба зазначыти, же вытяг диспонує єдном з найдолшых трас в полудньово-східній части Польщы о долгости 1400 метрів. Ціліст находит ся на східнім схылі Маластівской Маґуры, што дає любителям зимовых спортів красны видокы на Лемковину.

Сфільмували малы рысята

В Жывєцкым Бескіді в остатнім часі фотопримамка, замірено заінсталювана, жебы підходили ґу ній дикы звірята, награла рыся зо штырьома рысятами. Барз рідко мож такє видіти, прото зняты образы выкликаи велику радіст посеред членів Стоваришыня Для Натуры «Волк». Стоваришыня од долшого часу занимат ся моніторуваньом чысла популяциі великых котів. На тот ден в Польщы находит ся около 200 рысів, а такой половина з них – бо аж 96 штук – в реґіоні Карпат. Роберт Мыслаєк зо Стоваришыня «Волк» оцінят, же на обшыри шлезского воєвідства находит ся вшыткого 25 штук, а іх кількіст ся не зменьшат, што єст барзд добром новином. Рысі были обняты охороном зараз по ІІ світовій войні. Головным загорожыньом для тых спокійних і боязливых звірят єст насилена вытинка лісів, што заберат рысям іх натуральне жытлиско.

В кінци рушыт ремонт тзв. Кромера

Ремонт І Ліцею ім. Мартина Кромера в Ґорлицях і будинку Ґімнастичного Стоваришыня Сокіл єст уж певный. Оба будинкы мают уж своі рокы, прото ремонты сут необхідны. Актуальні в рахуючым понад 110 років ліцею вчыт ся понад 700 учеників, в тым і ґрупа Лемків з цілого повіту. Іщы в 2018 році зродил ся проєкт повітового староства і міста Ґорлиці, в котрым же рішено выремонтувати оба будинкы, а при нагоді три поблизкы улиці – Кромера, Ягайлы і Незалежности. Ремонты улиц, доріг і ходників скінчыли ся уж давно тому, проблемы явили ся аж при самых будинках, де кошты міцно перевысшыли заплянуваний містом буджет. Пак, староство запропонувало новый буджет, в котрым включено більшы выдаткы, што тіж дакус ограничыло обсяг прац, обнятых спочатку в проєкті. Ограничыня тыкают головно в пивниц ліцею, де мали найти своє місце новы шатні і вельофункцийны поміщыня – такы, котры хоснувала бы не лем школа, але і місто. Декотры з заплянуваных перше функцийональности, будут перенесены до выбудуваных в будучности пивниц Сокола. Окрем того, старый будинок ґімнастичного стоваришыня буде міг полнити функцию стріч скаутів, ци музичного центра, явил ся тіж плян основати театральну салю.

Свято Купців в Кракові

Вчера, 9. грудня/децембра, в Кракові проходило Свято Купців, орґанізуване Краківском Купецком Конґреґацийом, основаном в 1410 році. На святі явило ся много вченых, урядників, політиків і представників ріжних інституций. Ціліст зачала ся богослужыньом в костелі св. Варвары, пак святочно перешол традицийный купецкій похід. На зачатю подіі выступила ґуральска дітяча духова оркєстра з Скомєлмьй Чарной i Богданівкы, а на завершыня концерт дали Ґражына Бродзіньска і Якуб Очковскій,. Вчас стрічы промавляли президент Кракова проф. Яцек Майхровскій, бургомайстер Бжеска Томаш Ляхота і посланка Аґнєшка Сціґай. Єдным з найшажнійшых пунктів свята было пращаня з кінчучыма каденцию полномічныма і вручыня нагорід такых як срібна і бронзова статуетка середвічного шыфу Коґа, медалі 600-літя Краківской Купецкой Конґреґациі і почестна грамота за працу для Конґреґациі. Кульмінацийом вечера было пасуваня новых купців.