В майнах, копальнях і банях. Ден копальників – середа, 11.50 год.

З Лемковины, Пряшівской Руси і Підкарпатя столітями ходили люде робити до «майн». Ішли добывати угель в америцкій Пенсильваніі, до Німец і на Нижній Спиш. Окрем угля нашы русиньскы копальникы добывали руду срібра і сучасні, од 70. років ХХ ст. роблят в копальнях міди на Нижнім Шлеску: в Любіні, Рудній і Польковицях.

Днес, 4. грудня/децембра, окрем свята копальників выпадат тіж важне свято во східніх церквах, праздник Введіня в храм Пресвятой Богородиці. Тото свято особливо прославлят ся в православній парохіі Святой Тройці в Любіні. І зато, што того дня, в ден св. Варвары (за західнім календарьом) мают свій ден копальникы з мідьового комбінату, єдного з найбільшых во світі продуцентів міди і срібра. Як єм ся дознал, того рока на днешнє свято припадат 20. річниця постриженія, высвячыня за чтеця, нашого пароха, отця протоєрея Богдана Репелы.

Най мі буде дозволено з той нагоды передати отцьови Богданови найсердечнійшы желаня, а предовшыткым Божой Благодати, гідні духовой силы і дуже здоровля. Най Всемогучый Господ допомагат в його службі для церкви і нашого народа.

В свято копальників запрашаме слухати проґрам – інтервю з лемківскым копальником з Любіна Марияном Шкуратом.

Премєра проґраму о 11.50 год., реприза о 18.10 год.