«Слово» – 22-га неділя по Сошествії Святого Духа – неділя, 9.00 год.

В днешнім слові Євангеліє Ісус Хрістос говорить о двох людях в двох розділных сітуаціях.

Першым є богатый чоловік, котрого імя не познаме. Каждый день жыв в богатстві, радованках. І думав сі, же так буде все. Нич му не хыбовало. Жыв лем про пожадливости, про тіло, про землю. Другым быв Лазарь. Быв бідный і хворый, цілый покрытый струпами, котры псы приходячі ку ньому йому лизали. Так єден перебыв в радостях богатства, другый в болестях і великій біді. Но єдного дня ся вшытко змінило. Богач умер і поховали. Умер і Лазарь і ангелы го однесли до лона Авраама, на місце радости. Теперь видиме розділну сітуацію. Богач на місці мук в аді просить Авраама, жебы послав Лазаря з намачаным у воді пальцьом освіжыти йому язык. А Лазарь, котрый перебывав в тяжкій сітуації, теперь находить ся на місці радости. Авраам одказує богачови в аді, тепер уж бідакови: Здогадай ся сыну… І додавать: Мають Мойсея і пророків най їх слухають, а кедь не будуть так робити, та ани кебы дахто воскрес із мертвых не буде їм то на хосен і не покають ся.

Мы маме не лем закон Мойсея і пророків, но і наповніня закона Мойсея і пророків. Маме слово жывого Бога, котрый став ся чоловіком. Ісус тото слово говорить і ку нам. Жебы нас трапліня і тяжкости того віку не одлучіли од Бога. Бо радости тамтого віку не дають ся порівнати з траплінями того віку. А тыж, коли маме земне богатство, не привязуйме ся ку ньому, жебы нас одлучіло од Бога, бо терпіня тамтого віку, дають цалком забыти на пережыты роскошы в того віку. Слава Ісусу Хрісту!

В неділю, 17 новембра 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 17 новембра о 12.00 і 18 новембра о 2.00 год. за русиньскым часом.

Фото: Лазарь і богач, розпис. Рілскый Монастырь, wikimedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА