Перше Пшемків, пак Ґожів. Найблизшы подіі Стоваришыня Лемків

Стоваришыня Лемків просит в найблизшых днях на дві подіі, котры одбудут ся в двох лемківскых осередках на чужыні. Перша з них пройде в суботу, 16. листопада/новембра, в Пшемкові. Друга з подій, на котру просит ґожівскій Кружок СЛ, одбуде ся 24. листопада/новембра.

Обі подіі то концерты лемківскых і інчых запрошеных ансамблів. Пшемківскы і ґожівскы стрічы то уж цикличны подіі, якы од парунадцетьох років все осіню притігают любителів лемківской музикы і співу.

Три поколіня

Першом з двох листопадовых подій буде проходяча в найблизшу суботу акция під назвом Стрічы Трьох Поколінь з Лемківском Культуром. Буде то уж 13. едиция. Концерт зачне ся о 16.00 год. в Пшемківскым Домі Культуры.

В концертовій части выступлят домашній Лемківскій Ансамбль Пісні і Танця Ластівочка, діючый при ним діточый ансамблик Ластівчата, капеля Троянда, котру знаме головно з лемківскых весіль і забав, Лемківскій Ансамбль Пісні і Танця Кычера з Ліґниці, як тіж фольклорный ансамбль – Ославяне з Мокрого, што ся находит на східніх краях Лемковины. Більше про подію писали сме за тым мотузком.

Ґожівскы стрічы

Такой о тыжден по пшемківскых, в суботу, 24. листопада/новембра, в Театрі ім. Остервы одбудут ся ґожівскы стрічы. Подія під назвом Стрічы з лемківском культуром одбуде ся уж 27 раз. В вечернім концерті, котрый зачне о 18.00 год. в ґожівскым театрі, выступлят ґрупы з Лемковины, Пряшівщыны і чужыны.

Зо Словациі придут гудакы з ансамблю Rusyn Cendes Orchestra. З Ґорлиц до Ґожова піде фольковый ансамбль Бурян. Окрем того, на сцені представит ся ґрупа Re-Karpaty. Буде тіж місцевый ансамбль Lemko Tower зо Стшелец Краєньскых.

Гоноровый патронат над подійом дала Маршалок Любушского Воєвідства Ельжбєта Анна Поляк.