В Мадярьску по выборах найміцніше Общество Русинів/Рутенів Мадярьска

В Мадярьску в неділю 13-го октобра 2019-го року проходили комуналны выборы, в котрых собі выберали старостів сел, пріматорів міст і депутатів в містьскых і сельскых заступительствах.

Вєдно з тым собі 13 державов вызнаных народностных меншын могло выберати і свої містны меншыновы самосправы. На основі тых резултатів вытворили ся вседержавны самосправы. Своїх репрезентантів выберали і Русины.

Участь майже 70 процент

Русины в Мадярьску кандідовали на трьох кандідачных списках. Чісло єден за русиньску меншыну у выборах дістав кандідачный список Общества русиньской інтеліґенції імени Антонія Годинкы. Чісло два было вылосоване про Общество русиньской меншыновой солідарности. З чіслом три кандідовав список Общества Русинів/Рутенів Мадярьска.

Русины бы собі на основы даных з препису населіня із 2011-го року выберали склад 44-ох містных самосправ. Жебы могла выникнути меншынова самосправа, мусить в окрузі жыти подля офіціалных даных мінімално 25 людей, котры ся приголосили ку меншыні, якой самосправа там має выникнути.

Участь на выборах меджі Русинами была доста высока. До списку меншыновых волителів за русиньску меншыну было записаных 4294 людей, голосовати пришло 2852 особ, што представлює 68,84 процентну участь на выборах. 94 голосів было неплатных. Із выборів вышло найміцніше Общество Русинів/Рутенів Мадярьска.

Припоминаме, же цілкова участь на недільняйшых выборах в Мадярьску была лем 47 процент.

Вседержавна самосправа

Выборами ся сформовала і нова Вседержавна русиньска самосправа. Тота має 15 членів. Подля того, кілько процент здобыли цілково в містных самосправах окремы меншыновы спискы, приділили ся їм і мандаты у вседержавній самосправы.

Общество Русинів/Рутенів Мадярьска вышло з выборів як найміцнішый субєкт. У новім складі Вседержавной русиньской самосправы має 9 представителів, котрыма суть: Віктор Ґіріц, Петро Гладинець, Янош Кожняньскый, Віктор Крамаренко, Йожеф Мудра, Олґа Сілцер-Ликовіч, Янош Соноцькый, Мигаль Базіл Теленко і Ґабор Варґа.

На другім місці у выборах скінчів список Общества русиньской меншыновой солідарности, котрый здобыв 5 мандатів у вседержавній самосправі. За тот тото общество будуть свої мандаты выконовати Татяна Ерделій, Йожед Ердош, Янош Фаркаш, Іштван Гедій і Ласло Поповіч.

Лем єден мандат у вседержавній самосправі подарило ся здобыти списку Общества русиньской інтеліґенції імени Антонія Годинкы. Мандат на далшый період за тото общество має Штефан Лявинець, председа Світового конґресу Русинів.

Общество Русинів/Рутенів Мадярьска, укріпило свою позіцію в порівнаню з попереднім періодом, кедьже по тогорічных выборах має о єден мандат у Вседержавній русиньскій самосправі веце.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА