Василь Сочка выставлює в родиску свого отця

Як інформовала Карпатська Панорама посередництвом свого головного редактора Валерія Разґулова, 15-го октобра 2019-го року одкрыли в Берегові персоналну выставку Василя Сочкы. До Берегова того умелця, пластічного скулптора, запросив ґенералный конзул Мадярьска Матяш Сіладій.

Сочка выставлює в родиску свого отця, вызначного русиньского діятеля із Підкарпатя, поета, літературного історіка, прозаіка і публістісты Василя Сочкы-Боржавина. Як інформовав Разґулов, мадярьскый діпломат почас одкрытя выставкы вказав ся як добрі познакомленый із творчостьов Басиля Сочкы.

Василь Сочка ся народив у 1951-ім році в Ужгороді. В дітинстві навщівльовав ательєр Золтана Баконія. Хоць мав потрібну освіту, жебы зачати штудовати на художнім учілищу, не было му то уможнено. Хоць пізніше робив в многых професіях, цілый час занимав ся творчостов, роботов над саморозвитком. Аж кедь мав штиридцять років вырішыв присвятити себе уменю.

Меджі основны матеріалы, з котрыма Сочка робить, належыть наприклад ясень, бук, черешня, сливка, оріх але і бамбус.  Як сам говорить, його робота є іншпірована сакралнов ґеометрійов, козмічнов гармонійов, соєдиненьом мужского і женьского прінціпу.

Творы Василя Сочкы находять ся в музеях і пріватных колекціях в Споєных штатах Америкы, Канаді, країнах Шкандінавії, Чеській републіці, Мадярьску, Німецьку, Ізраілю і на Україні. Є лавреатом областной премії імени Йосифа Бокшая і Адалберта Ерделія (рр. 2000, 2013). Так само є членом Націоналного общества художників Україны од 1995-го року і Заслуженым майстром народной творчости (2018 р.).

Жрідло фотоґрафій: Карпатська Панорама. Василь Сочка на фотоґрафії горі другый зліва.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА