Лемківска афера в Пендоліно

Вчера, мал єм нагоду поіхати новым потягом Пендоліно з Кракова до Варшавы. Уж єм зачал думати, як тото маркетінґово прибрати, же редакторы порталю lem.fm, як першы спосеред Лемків, возят ся тым модерным потягом італияньской роботы, коли о два місця дальше моім очам, зараз при фотели, вказала ся вырізана ножом, або цьваком знана мі емблема.

Стерпіл бым і тото, же єм не досяг той чести – быти першым Лемком в Пендоліно (а так єм повіл завертаючому за…ок, ду…у, голову єдному з анкєтерів, звідуючому о комфорт подорожы), але смотрю – коло мене зберат ся Комісия Спільна Персонелю та Пасажерів дс. Актів Вандалізму в Пендоліно (КСПтПдАВвП) зложена з 5 осіб: єден з выбраных пасажерів, шофер, контролерка, анкєтерка і кухар з реставрацийного ваґону. Скоро-м втюк до преділу для діти до 6 років, а “мойому” анкєтерови єм повіл, жебы выкрислил подане мном “Лемко” і вписал “Лемко т.є. Русин – не Украінец”, жебы речена Комісия за скоро ся в тым не розобрала, а я выграм на часі. Боял єм ся як фрас, бо в інтернеті мож найти знимкы з конґресу Стоваришыня Лемків, на котрым і я был. Щестьом, хоц в Пендоліно мал быти безпроводний доступ до інтернету, іщы го не підлучыли. Уфф, подумал єм. Выйду з того цілий.

Кримінальны репортеры з радия лем.фм зачали скоро досліджувати тоту справу. І хоц дальше думаме, же то провокация зо стороны локальной Сіткы Безгрішных Учытелів, котра фурт контактує ся з чужыма спецслужбами, на першы сліды направила нас вроцлавска редакция загальнопольского порталю gazeta.pl, котра принагідні зафіксувала присутніст в Пендоліно “Pana Andrzeja z Wrocławia” (обовязково прочытайте за тым мотузком).

(Фото: Wikipedia)