Пятдесятка львівской Лемковины

Народный Ансамбль Пісні і Танця Лемковина зо Львова рыхтує ся до свого округлого ювілею – 50-літя діяльности. З той нагоды в понедільок, 14. жолтня/октобра 2019 р., в просторах Львівской Нацийональной Фільгармоніі одбуде ся святочна академія.

Ювілейный концерт зачне ся о 18.00 год. В проґрамі передвиджено офіцияльны привитаня і выступ ювіляткы – ансамблю Лемковина, котрый лемківску культуру головно серед діаспоры на Украіні підтримує од 1969 р.

Ансамбль переселенців

Лемковина зо Львова, як приняло ся называти тот хоровый ансамбль на розділ од другой Лемковины – леґендарного колективу з Білянкы, зорґанізуваного і долгы рокы веденого Маестром Ярославом Трохановскым, святкує як раз 50-літя артистичной діяльности. Невельох памятат, што біляньска Лемковина была так само офіцияльно основана осіню 1969 р., коли на Лемковину з західніх земель Польщы вернул Я. Трохановскій. Але то інча істория.

Хоровый колектив был основаный выключно переселеныма в 1940-1945 рр. Лемками, якы нашли ся на обшыри совітской Украіны. Початково сідиба ансамблю находила ся в селі Рудно, аж пізнійше нашла місце во Львові. Його першым артистичным кєрівником і дириґентом был Роман Кокотайло, коротко, бо лем до 1970 р. Дальшыма ведучыма были Михайло Мокрецкій, Тарас Матвіів, Ігор Циклиньскій. Як раз в тым часі прошли першы векшы успіхы – зачали ся концерты, выступы в радию і телевізиі.

Період працы Івана Кушніра, якій зачал ся в 1975 р., належыт до єдного з основнійшых в розвитку ансамблю. Кушнір вывюл ансамбль на найвысшый музичный рівен. Уж в жолтни/октобрі 1975 р. Лемковина была нагороджена дипломом І ступени на І Всесоюзным Фестівали. В 1986-1987 рр. ансамбль выдал двома тиражами першу велику платню під назвом Співат Лемковина, а в 1991 р. другу – Заграй мі, гудачку. О пару років, в 2005 р. з реченых двох платен были перевыданы записы на авдийодиску.

Наступцьом Кушніра был Роман Стефанко (1998-2000). По ним коротко хором завідувал Владимір Льорчак. Од тамтой поры аж до 2009 р. ансамбльом дириґувала Мария Мельник. Теперішнім хормайстром і артистичным кєрівником єст Юрий Кондратенко.

Амбасадорка культуры Лемків на східній чужыні

Од основаня львівскій ансамбль был амбасадором лемківской культуры. Лемковина концертувала в вельох областях Украіны. Давала і концерты в Естоніі, Словациі, Німцьох ци Польщы.

В репертуарі колективу находят ся головно лемківскы народны і авторскы творы. На основу складают ся пісні в обробці выдатных композиторів А. Кос-Анатольского, Є. Козака, М. Колессы, В. Флиса, І. Майчыка, Я. Трохановского, Я. Поляньского і інчых. За пятдесят років через ансамбль перевинуло ся пару поколінь Лемків. Найстаршы з них родили ся іщы на Лемковині. Початково была то лем хорова капеля, а од 2002 р. то ансамбль пісні і танця.

Лемковина з Лемковины витала Лемковину з Украіны

В січни/януарі 1989 р. Лемковина з Білянкы витала на рідній земли Лемковину зо Львова. З той подіі заховал ся відеозапис.

«Выпала нам велика чест! В імени Лемковины з Лемковины привитати Лемковину з Украіны. Витаме Вас тым святым хлібусьом. Він, будучы іщы зеренцьом, выріс даґде під Кычером, на нашій рідній землици. (…) Бо він єст символом жытя, символом істнуваня. Вы приіхали до нас, жебы нам дати символ духового жытя. І в Вашым бытю-жытю падали дощы, як на тот святый хлібусь. Дули вітры, але Вы жыли, не давали ся. І пережыли сте, дожыли сте, заквитли сте. Не забыли сте того, што не можна забыти. Боже Вам великє заплат, же сте приіхали до нас. (…) Не буду долго бесідувал, бо студін велика. Запрашаме Вас щырым, лемківскым серцьом. Придте до нас і дайте нам тоту велику духову пожыву. Одродте нас, поможте нам, жебы сме весільшы были, жебы было нам легше жыти», повіл на порозі ґорлицкой видовисковой салі Петро Мурянка, витаючы сестриный ансамбль.

В породожы Лемків з Украіны до Ґорлиц брал участ найліпшый хоровый склад ансамблю. Присутный был дириґент І. Кушнір, староста ансамблю Петро Байса, а од страны біляньской Лемковины єй найліпшы артисты. В Ґорлицях львівска Лемковина дала понад годинный концерт. Народны пісні были переплітаны рецитацийом лемківскых патріотичных вершів. Концерт згромадил чысленно прибылых Лемків з околичных сел і самых Ґорлиц.