Одновлена ікона з Климківкы

В історычным Музею в Саноку закінчены остали консерваторскы роботы трьох ікон з XVII i XVIII ст., та 298 археолоґічных забытків з полудньовой части Польщы. Серед реставруваных ікон нашла ся ікона з Лемковины – ікона Успіня Пресвятой Богородиці з Климківкы з XVII ст.  Одновлены іконы сут частю колекциі Історычного Музею в Саноку. Ікона з Климкківкы была уж консервувана в 60. роках ХХ ст. в працовни Музею Народного Будівництва в Саноку. При теперішній реновациі робили дві консерваторкы штукы – Барбара Бандурка і Анна Скрабляк. Завдякы тым роботам, іконы не будут підлігати нищіню і ушкоджыням.

Част реставруваных археолоґічных забытків, то середньовічны елементы оружя, якы выкопано в час археолоґічных робіт, веденых на городисках і замках саноцкой землі. Плянує ся помістити іх як част постійной експозициі про історию оружя (од середньовіча по час II Світовой войны). Другу част консервуваных забытків (вшыткых – 132), становлят найцікавшы археолоґічны забыткы, найдены в полудньово-східній Польщы, а презентуваны будут на окремій постійній выставі, посвяченій подіям Санока і околиц од епохы каміня по новожытніст.

Джерело: www.muzeum.sanok.pl