10. грудня – Ден чловечых прав

Днес Ден чловечых прав – медженародове свято встановлене Орґанізацийом Зъєднаных Наций (ОЗН) на памят даты схваліня Універсальной деклярациі чловечых прав (10. грудня 1948 р.).

Чловечы права то концепция піднимаючя проблем основных прав, котры достає каждий чловек, коли приходит на світ.  Сут неподвижны, універсальны, нероздільны, природны і сут бодай єдиным правом, котрого не можеме ся зречы. Хоц односили ся до них уж Вольтер і Жан Жак Русо, допіро досвідчыня ІІ Світовой Войны принесли рефлексию і кодифікацию тых основных прав і шырше хоснуваня державами.

Такой вшыткы демократычны державы світа включают понятя чловечых прав навет до свойой конституциі і інчых основных законів.

В тот ден, 10. грудня  2014 р., хочеме Вам припомнути, же не вшыткым людям во світі дозволено полністю хоснувати тоты універсальны і природны права. Посеред них находят ся і Русины з Підкарпатской Руси, котры, хоц жыют в демократычній державі, яком менує ся Украіна, до днес не были вызнаны народом, а поєдны діячы, котры ведут в тій обшыри непрестанну борбу, были не раз понижены і обдерты з гідности.