Страшливы збійникы… – віторок, 20.00 год.

В днях 21.-23. листопада т.р в Ждыни на Лемковині проходила Х Стріча Любителів Низкого Бескіду та симпатыків порталю beskid-niski.pl.

Тогорічний проґрам стрічы был вынятконо богатий, зато неє ся што чудувати, же притягнул іщы більше участників (близко 100) як по інчы рокы. Першого дня, в пятницю, запрезентуваны были аж 3 фільмы – Волчы горы, Маґурскы оповісти з років 1930-1960 і Карпатскы Циґане з польско-словацкого погранича. О ден, по долгій прогульці по войсковых цмонтерях і несподіваных одвидинах з Лемківскій Загороді в Ґладышові (приватний скансен п. Дзюбинів), пришол час на вечер прелекций. Заплянуваных было 10 прецікавых прелекций і мультімедияльных показів. І хоц выголошеных остало 9, то останій прелеґент скінчыл бесіду праві о 1.00 год вночы…

Про реляцию зо стрічы зазерайте на порталь beskid-niski.pl, а днес (віторок, 9. грудня) о 20.00 год. запрашаме до выслуханя єдной з прелекций – прелекциі Роберта Банькоша Страшливы збійникы Бєщадів і околиц.

Роберт Банькош – пасийонат Карпат, історик, реґіоналіста, бескідскій і бєщадскій провідник, автор вельох дописів і книжковых выдавництв тыкаючых істориі, войсковости, етноґрафіі, ци архітектуры Карпат, напр. Храм тишыны. Грекокатолицкы церкви на Лемковині (Świątynia ciszy. Cerkwie grekokatolickie na Łemkowszczyźnie), Церкви na пути ікон (Cerkwie szlaku ikon), Цервки бєщадскых Бойків (Cerkwie bieszczadzkich Bojków) та інчы.

(фотo: beskid-niski.pl)