Вернісаж поконкурсовой выставы „Мій Низкій Бескід”

2. грудня в Польско-Словацкым Домі ім. Душана Юрковича в Ґорлицях проходил поконкурсовий вернісаж, розвязаня конкурсу і вручыня нагорід та грамот 4. едициі конкурсу „Мій Низкій Бескід”, о якым писали сме за тым мотузком.

В конкурсі взяло участ парудесят школярів зо шкіл в Польщы і на Словациі. Конкурсовы знимкы поділены были на дві катеґориі – Люде і культура та Природа і архітектура. Почесны грамоты вручали представникы орґанізаторів – кєрівник Выділу Освіты, Культуры і Спорту Уряду Міста в Ґорлицях Александер Ауґустин і директор Ґорлицкого Центру Культуры Януш Зємба. Окрем тых двох інституций, орґанізаторами конкурсу были іщы Польско-Словацкій Дім ім. Д. Юрковича в Ґорлицях, Центр Культуры і Туристыкы, Польско-Словацкій Дім в Бардийові, Уряд Міста в Бардийові і Гірскій Кружок Союзу Польскых Артистів Фотоґрафіків.

Выставу мож обзерати до 7. січня 2015 рока в просторах Польско-Словацкого Дому ім. Д. Юрковича в Ґорлицях.

Знимкы з вернісажу можете обзерати за тым мотузком.