75 років Мирославы Хомяк

24. марця 1942 рока народила ся Мирослава Хомяк – педаґоґ та культурна діячка, а предо вшыткым особа, котра як єдна з першых по 1989 році заанґажувала ся в роботы маючы на ціли кодифікацию лемківского стандарду русиньского языка.

Мирослава Хомяк пришла на світ на Лемковині, в Устю Рускым, одкале в 1947 році была насильно выгнана вєдно з родином на західні землі Польщы. До рідного села змогла вернути в 1972, де прожыват доднес. Скінчыла росийску філолоґію і протягом бодай 40 років выкладала тот язык в середній школі. Коли в Польщы была основана перша повыселенча лемківска орґанізация – Стоваришыня Лемків (квітен/апріль 1989 р.), Мирослава Хомяк была єдном з делеґаток на І Конґрес орґанізациі, а дальше выбрана як член Головного Заряду. Вєдно з тым взяла активну участ при першых роботах кодифікациі лемківского вариянту русиньского языка. В «Бесіді» з 1990 рока (ч. 3-4/4-5), яка была посвячена реляциі з І Конґресу Стоваришыня Лемків, в біоґрамі нововыбраных членів заряду, про М. Хомяк чытаме м.ін., же є то […] автор першой части лемківской ґраматыкы (в машынописі), ІІ част в тракті писаня. Мирослава Хомяк є єдном з осіб, якы в 1991 році реактивували Стоваришыня Руска Бурса, будуче спадкоємцьом ґорлицкой Руской Бурсы.

Коли Міністерство Освіты Польской Республикы дозволило основати пункты вчыня лемківского языка в школах (1991 р.), М. Хомяк написала пару підручників для молодшых кляс, в тым чыслі лемківскы букварі (1992-93, 1996 рр.), чытанкы (1993,1995 рр.), словникы (1992, 1996-97 рр.), та ґраматику – Лемківска ґраматыка для діти – в 1992 році. Разом з проф. Генриком Фонтаньскым написали першу повоєнну лемківску ґраматику (Ґраматыка лемківского языка – 2000 р.), яка стала ся єдном з основ сучасного стандарду русиньского літературного языка. Через рокы свойой діяльности была орґанізаторком та активном участничком семінарів для учытелів лемківского языка. Мирослава Хомяк являт ся авторком вельох книжок присяченых вчыню і методиці лемківского языка, котрых лем деякы приміры можете видіти горі.

матуриста з лемківского языка (2014 р.) – Севериян.