70 років од першого выданя новинок „Руске слово“

Днесь минать якраз 70 років, коли 15-го юна 1945 р. вышло перше чісло новинок Русинів втогдышньой Югославії під назвов Руске слово.

Штотыждньовы новинкы друковали ся в рр. 1945 – 1967 в Руськім Керестурі а од 1968 року в Новім Саді. Од їх вынику друковали ся лем в языку Русинів Войводины і тіраж мали од 1000 до 1400 фалатків. Руске слово было наперед в рр. 1945 – 1951 орґаном „Народного фронту“, пізніше новинкы стали ся орґаном выдавництва і друкарні в Руськім Керестурі і од 1968 были під выдавництвом „Руске слово“ в Новім Саді.

Новинкы публіковали світовы новости і інформації о подіях в Югославії, так само і новости зо жывота містного русиньскго населеня. Од 1990 року Руске Слово зачало інформовати і о подіях зо жывота Русинів у світі.

Руске слово ся од початку 1990-тых років 20-го столітя стало формално орґаном Націоналного совіту автономной области Войводина. Міджі вызначных редакторів мож зараховати Штефана Чакана, Дюру Варґу, Дюру Латяка, Любоміра Рамача, Гелену Медєші і далшых.

Колеґам журналістам з Руского слова жычіть редакція порталу лем.фм іщі много успіхів в роботі і много років выдаваня новинок.

Жрідло інформацій: П. Р. Маґочій і кол.: Енциклопедія історії та культури карпатських русинів.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА