70 років неовавилоньской неволі – річницьовий номер «Бесіды» уж вышол

Дакус перше як все, бо і прикрий причынок ґу тому єст нагодом, Стоваришыня Лемків печатало новий номер часопису «Бесіда» (но. 2 (155), марец-квітен 2016). То чысло присвячене головно інформацийным цілям, про центральны обходы 70. річниці лемківского ексодусу – Акциі Вісла (1947-2017). Внутрі нововыданого номера «Бесіды» найдеме детальний проґрам рыхтуваных обходів, якы Лемкы заплянували на 28.-30. квітня/апріля т.р.  В новым чыслі «Бесіды» мож прочытати м.ін. статі:

• Andrzej Ćmiech, Wigilia zaczynała się od kęsa czosnku z solą, toastu za żyjących i zmarłych;
• Севериян Косовскый, Руска Бурса колядувала;
• Наталія Малецка-Новак, На краківскым рынку Лемкы заколядували;
• Севериян Косовскый, «Не плачте, же лежыме так далеко од люди…» – ремонт воєнного цмонтеря на Ротунді;
• Наталія Клинковска, Концерт Терочкы в «Літерацкій Кавярни» в Кракові;
• Севериян Косовскый, Йордан на Лемковині – посвячыня воды в Ліщынах; 
• Лука Сук, 100 років Штефана Габуры – реляция з прекрасного ювілею;
• Владимір Хыляк, Рыбы – выімок;
• Владимір Хыляк, Мій, блаженной памяти, дяк – выімок;
• Петро Трохановскій, 4000 кільометрів в 7 дни (3);
• Кондоленциі од Головного Заряду Стоваришыня Лемків і Редакциі «Бесіда» для др. габ. Олены Дуць-Файфер з причыны смерти матери бл.п. Олены Дуць (1927-2017).

На поєдных странах свіжого номера як все вельо фраґментів з доступной пресы, котры тыкают лемківскых справ, та інчы постійны рубрикы, як поезия (в тым же чыслі головно выселенча), ци Амрозовы передуманя. Выдавнича Поличка приносит нам інформациі про дві книжкы: Dynamické procesy v súčasnej slavistike та Tragiczna w skutkach Unia Brzeska.

Двомісячник «Бесіда» то часопис Головного Заряду Стоваришыня Лемків, выходит од 1989 рока, посвячений єст збережыню істориі, культуры і языка Лемків, інформуючий о жытю нашой і братніх нам соспільности, плекаючий вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст в каждий понедільок в годинах 14.00-18.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.