6. едиция Русиньского Фестівалю з новом атракцийом

Знана єст дата 6. едициі Русиньского Фестівалю во Свиднику – буде він проходил од 22. до 28. мая 2017 р.

Орґанізаторы реклямуют уж єдну з його новых атракций! Буде то плебісцит на найркасшу Русинку світа – Miss World Rusyn / Найкрасша Русинка. Конкурс буде проходил 25. мая 2017 р. Замірене єст, жебы кажду державу де жыют Русины, а то: Словация, Польща, Чехы, Украіна, Мадяры, ЗША, Канада, Сербія, Хорвация і Румуния, репрезентувала єдна кандидатка. Зголошувати можут ся дівчата од 18 до 28 років. Орґанізатор забезпечат закватеруваня, страву і транспорт.

Фестіваль Русиньской Культуры во Свиднику то бодай найбільший русиньскій фестіваль во світі. Орґанізуваний через Русинів для шырокой громады любителів русиньской культуры. Проґрам зрыхтуваний єст на цілий тыжден. В його рамках проходят стрічы з представниками русиньскых орґанізаций і інституций, або другых, котры занимают ся в даякій обшыри Русинами, сут промоциі книжок, театральны выступы з пєсами для діти і для дорослых, емісиі фільмів, выставы, а завершыньом фестівалю єст ціловікендовий проґрам з выступами фольклорных ансамблів, музычных, танцювальных і співочых колективів, презентуючых ріжны жанры русиньской музыкы. Фестіваль єст так подуманий, жебы публика в каждым віку нашла для ся дашто інтересуюче. Амбіцийом орґанізаторів єст вкзаня фестівалю, котрий буде подійом, дозваляюючом Русинам на Словациі презентувати ся на цілодержавным рівни як самостійна народніст, і вказувати участникам фестівалю свою унікальну традицию, культуру і язык.