5. річник Русиньского фестівалу в Гуменнім

Вігорлатьскый музей в Гуменнім у співпраці з партнерами орґанізує в днях 6-го аж 8-го септембра 2019-го року тридньовый проґрам 5-го річника Русиньского фестівалу із супроводным проґрамом.

Як інформовала Яна Федічова із Вігорлатьского музею, подія є часьтов музейных підпорных акцій присвяченых дням европской културной дідовизны. Головный музичный фестівал буде проходити 8-го септембра в природнім ареалі експозіції народной архітектуры і бываня – сканзені Вігорлатьского музею в Гуменнім в часі од 15.30 до 18.00 год. 

Фестівал має і супроводны події

В рамках фестівалового проґраму будуть проходити і супроводны події заміряны на сохраніня, презентацію і підпору розвитку реґіоналных културных традіцій і співпрацу при спознаваню европской културной дідовизны.

Почас першого фестівалового дня буде проходити  на Пріватній умелецькій школі в Гуменнім вернісаж фотоґрафій з богатой діялности фолклорных ансамблів з реґіону. Пятніцьовый проґрам продовжує русиньско-чесько-словацькым фолклорным вечором.

В суботу буде проходити фестіваловый проґрам на Кременці, верьху над селом Уліч, де стрічатють ся три граніці – словацька, україньска і польска. Там по сполочнім выступі музикантів і співаків одбуде ся меджінародный концерт.

Проґрам в неділю зачне торжественнов літурґійов у Православній церькви свв. Кіріла і Методія в Гуменнім. У недільнім фестіваловім проґрамі на амфітеатрі ся представить сім співацькых ґруп і пятнадцять солістів з окресів Гуменне, Снина і Меджілабірці. Детайлный проґрам можете прочітати долов на плаґаті.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА