33. Карпаторусиньскє Свято в Юніонтавн

В найблизшу неділю, 26. жолтня 2014 р., в грекокатолицкій парафіі св. Йоана Крестителя в пенсильваньскым Юніонтавн (201 East Main Street, Uniontown, PA) буде проходило 33. Карпаторусиньскє Свято. То шторічна імпреза, яку враз з парохом орґанізуют вірны тамтышньой парафіі, котрых предкы на поч. ХХ ст. пришли на тоту землю за ліпшым жытьом.

Карпаторусиньскє Свято то получыня духовой і культуровой спадковины Русинів, котры од понад стох років жыют в пілнічній Америці, але плекают памят і не забывают о своіх коренях.

Окрем богослужынь в юніонтавнскій церкви (17:30 субота, 9:00 неділя), присутны можут взяти участ в концертах ансамблів Славяне і Русиньскы Музыканты, а і посмакувати чудовых русиньскых страв, такых як: голубці, галушкы, кобаса, кышена капуста, тертяникы, поливкы і інчы. На зрыхтуваным ярмаку буде тіж змога видіти артистычну творчіст і народне ремесло: писанкы, кривулькы, облечыня.

Джон Ріґетті з Карпаторусиньского Общества вкаже участникам русиньску культуру і обычаі. Буде то мультімедияльна презентация о іконах, церквах, народным облечыню, але – як експерт од ґенеалоґіі – оповіст і о методах гляданя своіх коренів та досліджуваню істориі і інформаций о своіх предках.

Не бракне атракций для наймолодшых, котры выслухают байкы і оповіданя, а пак самы возмут ся за народне ремесло: мялюваня яєц, ци прикрашаня выпеченого кіста.

Кєд находите ся недалеко Юніонтавн, а то недалеко Пітсбурґа, в імени орґанізаторів – щыро просиме на найблизшу неділю на 33. Карпаторусиньскє Свято. Вступне дармо.