150 років од народжіня Михаіла Врабеля

20-го новембра минуло 150 років од народжіня педаґоґа, журналісты і фолклорісты – Михаіла Врабеля, знамого і під псевдонімом Іван Ґазда, котрый діяв на Пряшівскій Руси і у Войводині.

Народив ся 20-го новембра у 1866-ім році в селі Вырава, днесь в окресі Мідіжілабірці на Словакії. По закінчіню Ужгородьской ґрекокатолицькой учітельской семінарії  в році 1887 єден рік учів Михаіл Врабель на основній школі на теріторії днешньой Словакії і потім одышов до Войводины, де в роках 1888 – 1898 учів на основных русиньскых школах в Руськім Керестурі, Старім Вербасі і у Новім Саді.

В році 1898 угорьске міністерство сельского господарьства запросило Михаіла Врабеля до Будапешті на посаду редактора русиньской ґазеты Недѣля, котру Врабель редаґовав цілый час, покля існовала, значіть до року 1918. Як головный редактор в ґазеті публіковав містны новости, но і класічны творы україньской і російской літературы, а так само поезію і прозу русиньскых авторів ці русиньскый фолклор. До ґазеты приготовльовав шторічный додаток Приятель селянъ, приготовльовав і популарьный Букварь (мав штири выданя міджі роками 1898 аж 1910), котрый выдало Общество св. Василія Великого.

Найвеце знамым є Михаіл Врабель завдякы своїй збірці народных пісень „на разныхъ угро-русскихъ нарѣчахъ“ під назвов Русскій соловей, котра вышла у 1890-ім році. Так само є автором збірника народных співанок під назвов Угрорусски народны спѣванкы: Т.І.: спіѣванкы Мараморошски, котрый вышов в році 1900.

Врабель так само написав много статей присвяченых історії, културі і жывоту Підкарпатьской Руси. Умер 4-го януара 1923-го року в Будапешті.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА