15. Стріча Любителів Низкого Бескіду в Гуті Поляньскій

Од пятниці, 22. листопада/новембра 2019 рока, через три дни тырвала буде стріча осіб, якы улюбили сой спокійны пути Низкого Бескіду і фурт загубляют ся в історию той обшыри, познают штораз то інчы аспекты звязаны з єй фауном і флором.

Од 15. років в передостатній вікенд листопада/новембра, до котрысого місця в Низкым Бескіді зъізджают ся його любителі з розмаітых части польской державы. «Зачало ся в 2004 році, коли ґрупа осіб звязаных з НБ, розсіяна по Польщы, рішыла познати ся в реальности» – бесідує Бартек Вадас, орґанізатор Стрічы Любителів Низкого Бескіду. Од парунадцетьох років веде порталь beskid-niski.pl, істо компендиюм знаня про тоту част Польщы. Як мало хто знат місця і пути Низкого Бескіду, єст спілавтором туристичного путівника «Низкій Бескід. Од Команчы до Высовы».

Любителі НБ найперше зосереджали ся при портали beskid-niski.pl, особливі при його форум, де долгыма тыжнями, місяцями (a трафляло ся, што і роками) тырвали зажерты дискусиі, прим. на тему двоязычных таблиц місцевости на Лемковині (413 постів), барскых конфедератів (624 посты), ци про тото, ци акция «Вісла» то был злочын ци конечніст (816). В котрысым моменті рішено стрітити ся поза екраном. «Перша стріча при свічках прошла в Хыжці в Незнайовій, нона стріча зачала традицию дорічных листопадовых стріч. Першы три были типово товарискы, а од червертой стрічам товаришат промітаня фільмів про Низкій Бескід, концерты, прелекциі і доповіди осіб занимаючых ся Низкым Бескідом і Лемковином» – оповідат Б. Вадас.

Того рока стріча одбуде ся в Гуті Поляньскій. Подія зачне ся в пятницю (22. листопада/новембра) од спільной гостины з атракциями. Будут то: показ фільму вказуючого діґітальну, історичну реконструкцию села Бортне (більше о фільмі найдете гев) та варштаты лемківскых танців, якы вела буде Анна Романьчак. В суботу за дня заплянувано пішу прогульку, ґрупу поведе орґанізатор – Бартек Вадас. Пополудни передвиджено прелекциі. «Появлят ся м.ін. Войцєх Вєрдак, котрый оповіст про бывшу забудову лемківского села, Тадеуш Ґаєвскій зреферує, што ховают бескідскы лукы, а професор Лука Лучай забере нас в подорож ботанічных скарбів» – заохочат Пшемек Поляньскій з ансамблю А Де То Давнійше Строіло, спілорґанізатор подіі.

Вступне на прелекциі і прогульку дармо. Решту, значыт спаня і ідло, треба сой оплатити. Мож прити лем послухати доповіди. Заінтересуваных резервацийом місця до спаня просит ся о контакт під адресом: bartek@beskid-niski.pl

Фот. горі. Долина Тихані, Ярко Мазур Фотоґрафія