15.000 зл нагороды за сохраніня деревяных забытків в Малопольщы

Малопольскє воєвідство хоче черговий раз доцінити тых, котры занимают ся хороніньом і опіком над забытками деревяной архітектуры в Малопольщы. До 20. марця 2017 р. мож складати внесок о Нагороду ім. Марияна Корнецкого за выдатны досягніня в обшыри охороны деревяных костелів, церкви, дворів ци деревяных загорід, котры завдякы дбачой опікы были зревіталізуваны і находят ся посеред найціннійшых забытків народной культуры в малопольскым воєвідстві.

Діяня підниманы опікунами обєктів, котры можут быти достережены через Капітулу Нагороды, могли быти ріжны. Могли односити ся бодай лем до одповіднього утриманя і властивого хоснуваня обєкту, при протидіяню загорожыням, котры могли бы мати неґативне влияня на забыток. Дальше, могла то быти адаптация обєктів до новых функций, звязаных з туристиком, культуром, науком, ачий до мешканя або ведіня інчой діяльности. Узнаны можут быти консерваторскы, реновацийны або будівляны роботы, ведены над забытками, іх досліджаня і документация, а тіж промоцийны діяня. Нагороджены можут быти тіж культурно-едукацийны, проєкты промуючы деревяну спадковину малопольской землі.

Головний лавреат достане 15.000 зл нагороды і статуу, окрем того Капітула може выріжнити іщы трьох кандидатів. О нагороду старати можут ся позаурядовы інституциі і орґанізациі, інституциі культуры, стоваришыня, фірмы, якы занимают ся консервацийом штукы, поєдны консерваторы, высшы учельні, костелы, а тіж і уряды.

За два послідні рокы лавреатами нагороды были православны священникы, опікуючы ся лемківскыма церквами: в 2015 р. о. Мирослав Цідило, а в 2016 р. – о. Володислав Канюк. О. М. Цідило угоноруваний был за ремонт і адаптацию будинку старой плебаніі на Парохіяльний Історично-Природничий Музей і проведіня консерваторскых і реставраторскых робіт трьох церкви: в Бортным, Бодаках і Волівци. О. Канюка доцінено за опіку над 5 храмами, якыма завідувал через 20 остатніх років, будучы настоятельом ріжных парохій, особливо за выремонтуваня церкви Покровы Пресвятой Богородиці в Ганчовій.