Сумар дня на 13. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 13. вересня/септембра 2022 р.

Уж нич не блокує пішо-роверовой стежкы, котра лучыт Санкову з Вапенным

Пішо-роверова стежка то дост свіжа інвестиция ґміны одкрыта в 2021 р. Зачынат ся недалеко мосту над Санківком. Перше в страну Вапенного веде сам тротуар, а пак лучыт ся він з пішо-роверовом стежком. Перед інвестицийом тротуар вюл до полной дорогы, котром мож дойти до воєнного цмонтеря. На його кінци замонтували барєрку зо знаком, де находит ся цмонтір, але тіж про безпеку пішых, жебы не попадали до фосы. В часі будовы стежкы рішено засыпати тоту фосу, а на єй місце побудували пішо-роверову атракцию. Єднак лишыла ся барєрка, котра блокувала доступ до новой пути. В остатніх днях, по інтервенциі в ґміні Санкова горлицкого порталю Gorlice24, власти похылили ся над проблемом. Рішыли усунути половину блокуючой барєркы, завдякы чому пішы, як і роверисты можут безпечні хоснувати стежку, а інформуючый знак дале вказує, де находит ся цмонтір.

«Туристичны скарбы Малопольщы»

8. вересня/септембра зачал ся другій етап голосуваня в четвертій едициі конкурсу Малопольского Воєвідства пн. «Туристичны скарбы Малопольщы». О мено найліпшых оферт і туристичных продуктів старат ся парудесят обєктів і подій. Голосувати мож в парох катеґориях: місце з климатом, найбарже інтересуючый туристичный пут, циклична подія, унікатова туристична атракция, аґроґаздівка та ґастрономічный обєкт. Серед номінуваных находят ся тіж такы місця як м.ін. Біч, Камяна, Крениця, пут вколо Климківкы ци Скансен Нафтового Промыслу в Ґорлицях. Выграны возмут участ в промоцийній кампаніі Малопольской Туристичной Орґанізациі, а лавреат в катеґориі «Місце з климатом» отримат нагороду Маршалка Малопольского Воєвідства высокости 100 000 зл. Інтернетове голосуваня тырват до 27. вересня/септембра на сайті konkurs.visitmalopolska.pl.

Наступный етап документациі розбудовы желізницьового получыня на Нижнім Шлеску

Місяц тому інформували сме, што фірма Infra, занимаюча ся документацийом при розбудові желізницьового получыня Ліґниця-Любін-Польковиці-Ґлоґів, провела цикль консультацийных стріч. Бесіды будут частю документациі для проєкту пн. «Будова желізницьовой леніі Любін-Польковиці-Ґлоґів разом з розбудовом леніі нр. 289 на одтинку Ліґниця-Рудна Ґвізданів». Тепер выконавця документациі просит жытелів заанґажуваных ґмін выполнити анкєту, цілю котрой, так само як і стріч, єст провірити потребы і жаданя жытелів. Анкєта доступна єст в електронічній або паперьовій версиі, аркушы сут м.ін. в Уряді Міста Польковиці або на сайті уряду. Термін, до коли можна пересылати своі одповіди, минят 14. вересня/септембра.

По місяци закінчыл ся ремонт деревяного мосту в Баници

Мож уж безпечні хоснувати одремонтуваный мост в Баници на дорозі з Фльоринкы в страну Ізб. В рамках ремонтовых робіт зміцнили конструкцию та вымінили зовнішню верству. Кошт інвестициі то близко 250 тис. зл, з чого аж 200 тис. зл дофінансувало Надлісництво Лося, решту покрыл Повітовый Заряд Доріг і локальна фірма Drozdex.

«Карпатскє слуховиско»

Фонд Реґіональный Інститут просит на перше «Карпатскє слуховиско». Перша стріча пройде пн. «Обряды Бойків і Лемків» і вюл єй буде Станіслав Дрозд. Прелекция пройде 20. вересня/септембра в інтернетовій формі о 15.00 год. Мотузок до стрічы находит ся на фейсбуковым сайті Карпатского Народного Університету.