12 Сейм Русиньской Оброды в місті свого основаня.

Перед выборами на ведучого РОС редакция ґазеты “ІНФОРУСИН” задала вшыткым кандидатам тоты самы звіданя про іх програм як предсідателів. Пониже заміщаме автопрезентацию нововыбраного ведучого Русиньской Оброды на Словациі інж. Миляна Мнягоньчака з міста ГУМЕННЕ. Як каждий з трьох кандидатів пан Милян Мнягоньчак одповіл на 4 звіданя – 

1. Чом кандидуєте на финкцию председы в РОС? 

Ha функцию председы РОС кандидую зато, бо не єм спокійний з тым, як днешне веджыня РОС веде русиньскій рух, а до новых выборів на председу РОС не кандидує нихто, хто бы тото міг змінити. Інчы кандидаты сут членами теперішньой Выконавчой Комісиі, та што бы ся змінило? Нич. Гев ся жадат зміна.

2. Якы сут головны цілі вашого выборчого програму? 

Главны цілі сут ясны! Tpeбa зминити вшытко. Tenepiшне веджыня РОС оголосило 2014 рік, як рік русиньской спілпраци, зєднати Русинів. То сут лем фразы. Tа вылучыли вшыткых колективных членів (інчы організациі асоцюваны при РОС – прип. лем.фм) і не берут они участи ани в посіджынях Округлого Стола Русинів Словациі, та кого хотят зєднати? Я мам барз добры контакты зо вшыткыма русиньскыма організациями, та лем я можу Русинів зєднати.

Русини мусят тягати за єден мотуз, бо інакше ничого ся не доробиме, кед єден другого буде нищыти, жебы веце собі самому одкроіл з колача, котрий дає міністерство на нацьональны меншыны. Тоты пінязі не може ділити комісия, котру не знаме хто установил, а тота комісия роділят од бука до бука, не так, як потрібуют того Русины. Кед был бым выбраний на предсідателя РОС, та тоты пінязи розділят Русины, котры знают, што є першорядне про Русинів.

РОС в области розвитку шкільництва і культуры не зробила през остатніх 20 років нич. Лем за предсідателя Василя Турока сме здобили театр Александра Духновича і ПУЛьС воює з проблемами. РОС ся не інтересує абсолютно о ТАД і ПУЛьС. Теперішньому веджыню РОС старчат лем участи на фестівалях і  штонайвеце одкроіти пінязи з Уряду Влады СР (з канцеларіі премєра Словацкой Республикы). Не може быти таке, же пінязи не достают тоты, што іх мают дістати. З тых пінязи ся краде на проваджыня і арендуваня канцеляриі РОС. Лем же і так аренду за канцелярию од листопада 2013 заряд РОС не платит.

3. Як бысте з noзициі РОС вырішыли основний проблем русиньского руху – русиньскє шкільництво?

Проблем русиньского шкільництва є поле неоране. Ту в першым ряді треба тиснуту на владу СР, жебы вытворила условя (варункы) потрібны для розвитку шкіл нацьональных меншын, а аж потім орґанізувати інтерес о русиньске шкільництво. Теперішны власти нам зліквідуют і тоты дві основны школы, коли прийме новий закон про малоклясовы школы.

4. Што зpoбите як перше, кед будете выбраний на предсідателя РОС? 

Перше, што зроблю, як буду выбраний на пресідателя РОС

a) повыплачам вшыткы долгы, котры має РОС;
6) забезпечу достойний центер про РОС;
в) установлю робочый тім – секретарят;
г) забезпечу достаток фінансів про русиньску пресу;
ґ) влучу РОС до Округлого Стола Русинів Словенска;
д) выбудую міцну членску базу Русинів, але головні до діянь в русиньскым руху влучу значучы русиньскы особы.

(здрой ІНФОРУСИН, 5/2014)