Сумар дня на 3. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 3. лютого/фебруара 2021 р.

O. Баранчук уж не буде душпастырювал на Лемковині

На офіцийным сайті Польской Автокефальной Православной Церкви явила ся інформация, што 1. лютого/фебруара в Ґорлицях, Высокопреосвященнійшый Паісий, Архієпископ Перемышльскій і Ґорлицкій подякувал о. прот. Акрадийови Баранчукови за 23 рокы службы Церкви. Владыка, апробуючы просьбу о. Баранчука, звільнил го зо вшыткых становиск перемышльско-ґорлицкой єпархіі і благословил перехід в склад духовенства лодзіньско-познаньской єпархіі. В бесіді з редакцийом о. Баранчук подал, што неє іщы декрету бесідуючого о його будучности, кєд іде о становиско в новій єпархіі, але запросил вшыткых на пращальну літуругію до церкви в Реґєтові, котра пройде в найблизшу суботу, 6. лютого/фебруара, о 10.00 год. На його місце на становиску директора Православного Осередка Милосердя Елеос в Ґладышові был менуваный о. прот. Мирослав Цідило, заступцьом о. Ярослав Ґрич, котрый был і менуваный парохом православной парохіі в Ґладышові з дочырньом церквю в Реґєтові. O. Баранчук душпастырювал на Лемковині од 1998 рока, значыт од часу, коли был рукоположеный на священника.

В Сербіі про проблемы меншын

28. січня/януара тр. проходила стріча онляйн новосадского Центра про Реґіонализм і Фундациі Ганнса Зайдела, вчас которй бесідували про економічный статус і положыня нацийональных і етнічных меншын в реґіоні. Досліджыня вказуют, што члены меншын жыют в руральных і нерозвиненых обшырях, а іх економічна сила є найслабша порівнуючы з рештом населіня. Наслідством того є велика ступін міґрациі ци асиміляция. Олена Папуґа, державный секретар Міністерства про Людскы Права, Права Меншын і Социяльный Діалоґ, а і членкыня Нацийонального Совіту Русинів в Сербіі, в рамках свого выступліня на стрічы задеклярувала, што одвидит вшыткы нацийональны совіты і з представниками меншын в Сербіі буде бесідувала про вшыткы проблемы, з котрыма ся стрічают. Підкрислила, што велика міґрация псує образ о Сербіі як мультікультурній державі.

Туристичный потяг буде іздил дорогами Меджелаборец

Од мая тр. буде по Меджелабірцях і околиці іздил туристичный потяг, лем буде він іздил не по торах, а по дорозі і буде стилизуваный на ретро поізд. Має становити додаткову туристичну атракцию в оферті міста. Потяг буде запаркуваный коло Музею Енді Варголя, а в пляні єст, жебы іздил по місті і близкій околиці, вказуючы туристам цікавы місця, як нп. історичный монастыр в Красным Броді, село Габура, де находит ся різба князя Лабірця, або Калинів – перше освободжене село на обшыри Чехословациі. В рамках проґраму Interreg V-A Польща-Словация 2014-2020 окрем реченого поізду Меджелабірці плянуют закупити дві електронічны таблиці з розписком курсуваня автобусів і потягів на великій і малій желізничній стациі, а три автобусовы пристанкы уж были осаджены кінцьом минулого рока.

Методом на внука оциґанены жытелі ґмін Устя Рускє, Ґорлциі і Лужна

110 тис. зл лем в минулым тыжни мал одобрати «курєр», коло 20-літній жытель Польной в новосандецкым повіті од жытелів ґмін Устя Рускє, Ґорлиці і Лужна оциґаненых методом на внука. Найпевнійше діял в зорґанізуваній ґрупі. Прокуратура зашмарила му поміч в зреализуваню злочыну, за котру горозит до осмох років вязниці. Суд рішыл о його часовым арештуваню. Сценарий был такій сам за каждым разом – хтоси дзвонил до сеньорів, подаючы ся за когоси з близкой родины, і бесідувал, што спричынил выпадок, дале телефон был передаваный гейбы поліциянтови, котрый робил історию вірогідном, а пак были подаваны інструкциі про передаваня грошы. «Курєр» одберал грошы з вызначеного місця. Арештуваный подає, што не знал, што одберат, мимо того Рейоновый Суд в Ґорлицях рішыл затримати го в арешті на три місяці.