10 років закону про Нацийональны і Етнічны Меншыны

В середу 18. лютого 2015 р. в Соймі Польской Республикы, одбыло ся спільне засіданя парляментарной Комісиі Нацийональных Меншын і Спільной Комісиі Уряду та Нацийональных і Етнічных Меншын, посвячене 10. річници схваліня закону, котрий офіцияльні вызнал Лемків за етнічну меншыну, т.є. бездержавну нацию (довєдна з Ромами, Татарами і Караімами). В роботах над законом, в пояснінях, Сойм ПР ґварантувал вызнаня за лемківску етнічну меншыну той части лемківской соспільности, котра не чує ся быти украіньском меншыном.

Устава з дн. 6. січня 2005 рока, дозвалят меншынам реалізуваня своіх языковых прав і накладат на міністра властивого до справ меншын обовязок підпорюваня вшелеякых інициятыв, котры мают служыти захороніню і розвиткови лемківской нацийональной достоменности і лемківского языка.

На основі того закону м.ін. Стоваришыня Лемківской Молодежы ЧУГА выстарало ся о поставліня на Лемковині двоязычных польско-русиньскых таблиц з назвами сел. Завдякы реалізуваной ґрантовой задачы функцийонує і русиньскоязычне радийо і порталь ЛЕМ.фм+.

Од Сойму Польской Республикы за вызначны заслугы в роботах в меншыновым просторі, котрий реалізуваний єст на ріжных полях, угоноруваны были представникы ріжных меншын. З лемківской меншыны за свою долголітню успішну роботу на ниві підтримуваня лемківской етнічной достоменности, освітовых і культурных задач, почестну грамоту отримала проф. Олена Дуць-Файфер.