Все веце турістів має інтерес о Чертіжне

Село Чертіжне на Лабірщіні знаме як місце, де є похороненый Адолф Добряньскый, котрый там мав свою курію, ці як єдно із центрів Чертіжняньско-габурьского бунту із 1935-го року, коли повстали рольници.

Но тото село в рамках черезгранічного проєкту в остатнім часі зреалізовало вецеро актівностей, котры мають дати вклад до векшого звидительніня його културной, історічной і природной дідовизны.

Гроб будителя в Чертіжнім є културнов памятков єднако як і містна церьков і будова бывшой жандарьской станіці. Як раз на тій суть памятны таблы припоминаючі Чертіжняньско-габурьскый бунт і освободжіня села.

„На будові Дому културы є табла присвячена жертвам ІІ. світовой войны, в селі бы мала прибыти далша памятна табла припоминаюча Добряньского,“ повів про словацьку державну пресову аґентуру TASR староста села Петро Трічак.

Нову таблу, на котрій має быти і буста Добряньского, дало зробити обчаньске здружіня Колысочка – Kolíska. Здружіня выписало на тот замір в рамках юбілейного Рока Адолфа Добряньского, котрый быв выголошеный Округлым столом Русинів Совеньска у 2017-ім році із нагоды 200-ой річніці народжіня будителя, публічну збірку. Вызберало ся понад 2000 евр. Таблу має зробити академічна скулпторка Ева Потфайова-Ільковічова, дівка вызначного русиньского фізіка Діонізія Ільковіча.

Село в рамках проєкту реалізовало різны ставебны актівности, зробили ся новы інформачны табліці о інтересностях реґіону, друком вышла публікація о селі. Сума вытрат на цілый проєкт, котрый быв співфінанцованый із Европского фонду реґіоналного розвитку 85-ма процентами, быв 50 500евр. 10 процент фінанцовало ся із державного бюджету, 5 процент дало Чертіжне. Іде о першый проєкт до котрого Чертіжне ішло вєдно із ґмінов Яслиска на польскім боці.

Подля старосты Трічака є село подобным проєктам одкрыте, бо і на основі того росне інтерес о Чертіжне. Найвеце турістів, за словами старосты, видіти в літі, ходять на біціґлях, на автах і піше, но і в зимі ся вкажуть на ліжах – біжках.

Лем вчера село на своїм профілі на сіті Facebook інформовало, же в Чертіжнім вже ку табліцям на зачатку і кінцю Чертіжного прибыло і русиньске означіня Сільского уряду. Означіня міста або села і урядных будов на тій теріторії в языку народностной меншыны є зо закона обовязкове всядыль там, де меншына досягля холем 20 процент жытелів за даныма перепису населіня.

Жрідло фотоґрафії: Село Чертіжне.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА