Умер Іван Бандуріч

Дня 21-го юнія 2017-го року у віці  83 років умер в Бардейові русиньскый актівіста, културно-общественный діятель Іван Бандуріч.

Іван Бандуріч надордив ся 7-го юнія 1934-го року у Стриговцю, в окресі Снина. Быв чоловіком, котрый стояв при початках русиньского возродного процесу на Словакії по році8 1989, і котрый у тім русі быв актівный аж до кінця. Быв основательом Русиньской оброды – Реґіоналного клубу в Бардейові, довгорічным членом Коордіначного выбору Русиньской оброды і членом Рады влады СР про народностны меншыны і етнічны ґрупы за Русинів.

Почас свого продуктівного віку Іван Бандуріч перешов многыма функціями у сфері културы, охороны културных памяток і сполоченьско-політічного жывота. Наприклад, він быв і основательом Окресной памятковой справы в Бардейові і довгорічным директором той інштітуції (1971 – 1992). Обновліня історічного центру міста Бардейов, выбудованя сканзену в Бардейовскых Купелях і много далшого – на тім вшыткім мав заслугы як раз він.

Нелем русиньска громада, але і културна громада Словакії в Іванови Бандурічови страчать великого діятеля. За вшытко, што зробив за свій жывот на благо Русинів і културы на Словакії, му належыть велика подяка.

Похороненый буде Іван Бандуріч в пятніцю, 23-го юнія 2017-го року, на Великім цінтері в Бардейові. Похоронны обряды зачінають о 15.00 год. Вічная память!

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА