Стріча Норвеґів в Рускій Бурсі

Вчера, 9. жолтня бурсяна бібліотека принимала в своіх порогах польско-норвежску делеґацию, што звязане з участю Стоваришыня Руска Бурса в проєкті Бібліотека Місцьом Стріч Вельох Культур. То проєкт, якого цілю є выпрацуваня моделю бібліотекы інтеґруючой місцеву, ріжнорідну соспільніст і реалізуваня вельокультуровых діянь підниманых разом з представниками меншын. Реалізатором проєкту є Фундация Розвитку Інформацийного Соспільства, a берут в ним участ: 3 воєвідскы бібліотекы, 9 повітовых і 36 ґмінных зо зріжницюваных культурово воєвідств Польщы. Своім досвідчыньом польскы бібліотекы сперат 6 норвежскых бібліотек.

Містна Публична Бібліотека ім. Станіслава Ґабриєля в Ґорлицях, як лідер ґорлицкого партнерства завязаного в рамках проєкту (в його склад входят іщы Ґмінна Публична Бібліотека в Ропі, Ґмінна Публична Бібліотека в Санкові і Осередок Культуры Ґміны Ґорлиці), запросила до участи Объєднаня Лемків і Стоваришыня Руска Бурса. Цілю участи вшыткых підметів є опрацуваня і удоступніня бібліотечных реґіоналів обох орґанізаций шырокому спектрум адресатів. Збірникы останут опрацуваны в бібліотечным сыстемі СОВА2, завдякы котрому буде мож перезерати бібліотечны каталоґы он-ляйн , а пак зарезервувати, выпожычыти на місци ци дохыж. Найціннійшы позициі останут здіґіталізуваны і влучены до Ґорлицкой Цифровой Бібліотекы.

В бібліотечных колекциях Стоваришыня Руска Бурса находят ся історичны, культурны і реліґійны публикациі як тіж підручникы і науковы помочы до вчыня лемківского языка. Особливо вартістны бібліотечны колекциі то архівальны номеры ґазеты Лемко выдаваной в роках 1911-1914, як тіж памяткы і рукописы знаменитого лемківского писменника Івана Русенка згромаджены в Ізбі Памяти. Стоваришыня Руска Бурса веде свою выдавничу діяльніст оперту на літературным лемківскым языку – выдає меншыновий часопис о науковым характері – Річник Руской Бурсы, клясику лемківской літературы, як Карпатскы новелі (дві части) Петра Поляньского, ци Шыбеничний Верх Владиміра Хыляка (того рока плянуване є выданя другой части Повісти і оповідань), а попри тым выдавництва музычны – Пісні і співанкы Петра Мурянкы (дві части), а в тым році выдана остане платня Міцне Зіля, на якій зареґіструвана буде корінна лемківска музыка.

Вшыткы охочы, якы хотят схоснувати оферту бібліотекы Руской Бурсы, мают таку можніст в каждий понедільок (в год. 15-17) і пятницю (в год. 9-11).