Горит Лемківска Ватра в Михалові. Нагорода ім. Никыфора для Мариі Стеранкы-Трохановской

В перший ден 38. Лемківской Ватры на Чужыні, капітула Стоваришыня Лемків вручыла признавану од парох років нагороду ім. Никыфора – Епифана Дровняка, за діяльніст в обшыри лемківской культуры. Статуа 3. серпня/авґуста 2018 р. повандрувала до рук Мариі Стеранкы-Трохановской.

Андрий Копча, ведучий Стоваришыня Лемків, котре од дакілько років признає нагороду ім. Никыфора, в ватряний вечер оголосил зо сцены, што тогорічне оцініня передане буде М. Стеранці-Трохановскій, долголітній солистці леґендарного ансамблю «Лемковина» з Білянкы. Нагороджена співала в ансамблю вчас його найбільшых успіхів і досягнінь.

Стеранка-Трохановска знана была в «Лемковині» з натурально міцного голосу, котрым переспівувала заєдно лемківскы народны співанкы, як і патріотичны пісні. Як заслужена солистка колективу, выступувала м.ім. з пісньом «Тяжко жыти на чужыні», котра самособом што рока є выконувана сучасныма ансамблями на Лемківскій Ватрі на Чужыні. Захованы сут рекорды з інчыма награнями лавреаткы, а то хоц бы зо співанком «Тиха вода».

Лавреатка доднес є єдным з найбліьше розпознавальных членів ансамблю з Білянкы. Єст іконом колективу, котрий через рокы комуністичного поневоліня был не лем музычным і танцювальным ансамбльом, але тіж неформальном русиньском орґанізацийом. М. Стеранка-Трохановска брала участ в турне «Лемковины» по ЗША i Канаді в 1987 р. Попри Маестрі Ярославі Трохановскым, Штефаніі Трохановскій, Петрі Мурянці-Трохановскым, Павли Стефановскым і інчых, Мария Стеранка-Трохановска є єдном з найвеце прислуженых осіб з кругу білянчаньского ансамблю.

Никыфор то нагорода, котра што рік є признавана особі, яка свойом діяльністю внесла дашто цінне в пошырюваня, розвиток і плеканя лемківской культуры. Дотепер лавреатами нагороды остали м.ін. Павел Стефановскій, Петро Трохановскій, Ярослав Трохановскій, Адам Барна, Ярослав Горощак, Олена Дуць-Файфер, Андрий Копча і посмертно Михал Романяк.